“Saxovat va ko‘mak” jamg’armasi orqali quyidagi moddiy yordamlar ko‘rsatiladi
Nogironligi bo‘lgan shaxslar va ularning oilalari «Saxovat va ko‘mak» jamg‘armasidan quyidagi yordam turlarini olishlari mumkin:
- Tibbiy yordam: Og‘ir va uzoq vaqt davolanish talab etiladigan kasallikka chalingan oilalarga davolanish, dori-darmonlar xaridi va reabilitatsiya xizmatlari uchun moliyaviy ko‘mak.
- Moddiy yordam: Og‘ir ijtimoiy ahvolga tushib qolgan oilalarga birinchi darajali ehtiyojlarni qoplash uchun bir martalik moddiy yordam.
- Uy-joy sharoitlarini yaxshilash: Uy-joy sharoitiga ega bo‘lmagan oilalarni qo‘llab-quvvatlash uchun uy-joylarni ta’mirlash, rekonstruksiya qilish yoki qurish uchun mablag‘ ajratish.
- Kommunal to‘lovlarda yordam: isitish ta’minotidan uzilgan oilalarga yordam ko‘rsatish.
Og‘ir va uzoq vaqt davolanish talab etiladigan kasallikka chalingan oilalarga yordam ko‘rsatish dasturi doirasida quyidagi yordamlar ko‘rsatiladi:
• bazaviy hisoblash miqdorining (BHMning) 10 baravarigacha bo‘lgan miqdorda dori-darmon bilan ta’minlash xarajatlarini qoplash;
• BHMning 50 baravarigacha bo‘lgan miqdorda davolanish xarajatlarini (yashash va yo‘l xarajati bilan birga) qoplash.
• Bunda dori-darmon bilan ta’minlash xarajatlarini qoplash uchun bitta oilaga bir yilda ikki marta, davolanish xarajatlarini qoplash uchun esa bir yilda bir marta yordam ko‘rsatilishi mumkin. BHMning 5 baravarigacha bo‘lgan mablag‘lar ijtimoiy himoyaga muhtoj shaxsning bank plastik kartasiga o‘tkazib beriladi, qolgan holatlarda esa tegishli mablag‘lar shartnoma asosida o‘tkaziladi;
2025-yil 1-avgustdan boshlab bazaviy hisoblash miqdori (BMH)—412 000 so‘m etib belgilangan.
• BHMning 1 baravari miqdorida oziq-ovqat,
• BHMning 5 baravarigacha miqdorida kiyim-kechak va boshqa eng zarur tovarlar bilan ta’minlash xarajatlarini qoplash.
Birinchi darajali ehtiyojlarni qoplashga ko‘maklashish dasturi doirasida quyidagi yordamlar ko‘rsatiladi:
Eslatma! Oziq-ovqat yordami – har 3 oyda (chorakda) bir marta beriladi. Kiyim-kechak yordami esa yiliga ikki marta ajratilishi mumkin. Pul muhtoj odamning bank kartasiga o‘tkaziladi yoki yordam oziq-ovqat va kiyim-kechak shaklida (natura ko‘rinishida) beriladi.
Uy-joy sharoitiga ega bo‘lmagan oilalarni qo‘llab-quvvatlash dasturi doirasida quyidagi yordamlar ko‘rsatiladi:
• olti oy davomida har oyda ijara shartnomasining 50 foizi, lekin BHMning 4 baravaridan ko‘p bo‘lmagan miqdorda vaqtincha boshpana uchun xarajatlar (ijara to‘lovining to‘liq yoki qismini) qoplash.
• BHMning 50 baravarigacha bo‘lgan miqdorda bir martalik uy-joy ta’mirlash xarajatlari, shu jumladan, yolg‘iz keksalar va nogironligi bor shaxslarning yashash sharoitlarini yaxshilash xarajatlarini qoplash. Ushbu mablag‘lar ijtimoiy himoyaga muhtoj shaxsning bank kartasiga to’g’ridan-to’g’ri yoki shartnoma asosida o‘tkaziladi.
Ijtimoiy inspeksiyaning Surxondaryo viloyati boshqarmasi bosh mutaxassisi E.Tojiyev
