Энг улуғ ва энг азиз,
Ватан учун яшайлик.
Миллатга танҳо юлдуз,
Ватан учун яшайлик!
Тўкмайин кўз ёшини,
Эгмай тоғдек бошини.
Яшнатиб қуёшини,
Ватан учун яшайлик!
Тўмарисдек мард бўлиб,
Асрайин фарзанд бўлиб.
Пойига пайванд бўлиб,
Ватан учун яшайлик!
Гуллатай боғ-у роғин,
Аритай дилдан доғин.
Олай берган сабоғин,
Ватан учун яшайлик!
Боладек меҳр ила,
Онамдек айтиб алла.
Мадҳ этайин баралла,
Ватан учун яшайлик!
Кўзим қароғи Ватан,
Уйим чироғи Ватан.
Тинчлик байроғи Ватан,
Ватан учун яшайлик!
Орадан қарийб 29 йил ўтган бўлсада, Мустақиллик айёми бизга бир олам қувонч ва туйғулар бағишлайди. Беихтиёр энтикамиз, фахрланамиз. Ахир ота-боболаримиз мустақилликни узоқ вақт орзу қилмаганмиди, бу йўлда миллатимиз фидойилари жонларини қурбон этмаганмиди?
Ҳа, дарҳақиқат мустақиллик ўз-ўзидан бўлган эмас. Ҳар бир даврнинг ўз синовли кунлари бўлгани каби, бугунги кунимизда ҳам миллатимиз келажаги учун жонларини фидо қилаётган, халқнинг соғлиги ва осойишталиги йўлида тиним билмай меҳнат қилаётган шифокорларимизни «ВАТАН УЧУН ЯШАЁТГАН, КУРАШАЁТГАН» халқ посбонлари сифатида эътироф этмасак бўлмас. Мана шундай жонкуяр инсонлар биз учун доимо ўрнак намунаси бўла олади.
Шу ўринда айтиб ўтишим жоизки, Давлатимиз мустақилликка эришгандан сўнг ҳаётимиз тубдан ўзгарди. Ҳозир мамлакатимизнинг қайси туманига, қайси бир чекка қишлоғига борманг кўтаринки кайфиятга, ижобий ўзгаришга гувоҳ бўласиз. Узоққа бормайлик воҳадошлар бу сўзларим исботини туманимизнинг шаҳар ва қишлокларида ҳам кўришингиз мумкин. Мен фахр билан шуни айта оламанки, мустақиллик бизга нафақат эркимиз ва тинчлигимиз, балки фарзандларимизнинг келажагига бўлган ишончимизни қайтарди.
Масалан: Давлатимиз раҳбари томонидан ҳаётга тақдим этилган ва кейинги пайтда мамлакатимиз бўйлаб кенг ёйилган «Бешта муҳим ташаббус» нинг моҳиятини олиб қарасангиз, мустақилликнинг мустаҳкам пойдеворини ҳамда болаларимизнинг буюк келажагини кўра оласиз.
Бугун бутун дунёни ларзага солган пандемия туфайли биз Ўзбекистон аҳли, бу йилги мустакиллигимизнинг 29 йиллигини катта саҳналарда нишонлай олмаётган бўлсакда, байрамни қалбдан ҳис қилиб турибмиз ва оилавий ўз уйимизда, кичик ватанимизда нишонлашни мақсад қилдик.
Зеро, мана шундай синовли даврда барчамиз камарбаста бўлиб, бир биримизни қўллаб-қувватласак, қийинчиликларни мардонавор енгиб ўтамиз.
Ватанимиз учун, халқимиз учун ёниб яшайлик!
Дилфуза Гаппарова,
4-сон мактабгача таълим муассасаси тарбиячиси
