«Ижтимоий ҳимоя ягона реестри» ахборот тизимида кам таъминланган оила сифатида рўйхатга олинган оилаларга қатор имтиёзлар берилаётганидан хабардормисиз

Ўзбекистон Республикаси Президентининг 2020 йил 4 августда қабул қилинган “Аҳолига  давлат ижтимоий  хизматлари ва ёрдам тақдим этиш тартиб-таомилларини автоматлаштириш бўйича қўшимча чора-тадбирлар тўғрисида”ги ПҚ-4797-сонли қарорининг 3-иловасига мувофиқ, «Ижтимоий ҳимоя ягона реестри» ахборот тизимида кам таъминланган оила сифатида рўйхатга олинган оилаларга бепул ёки имтиёзли шартларда кўрсатиладиган ижтимоий хизматлар ва ёрдамлар рўйхати тасдиқланди. Улар қуйидагилар:

-Давлат мактабгача таълим муассасаларида ота-оналар тўловидан озод этиш;

-Мактабгача таълим муассасаларида ўрнатилган миқдорларда ота-оналар тўловини тўлаш;

-Умумий ўрта таълим мактабларида дарсликлар ижара тўловларидан озод этиш;

-Умумий ўрта таълим мактаблари ўқувчилари учун қишки кийим-бош бериш;

– Айрим фанларни ўқитишга ихтисослаштирилган умумий ўрта мактаблар ўқувчиларини овқатланиш харажатларидан озод этиш;

– Санъат мактаблари, мусиқа мактаблари, «Баркамол авлод» марказлари ва бошқа мактабдан ташқари таълим муассасаларида ўқиш харажатларидан озод этиш;

– Кам таъминланган оилаларнинг ногирон аъзоларини протез-ортопедия буюмлари билан таъминлаш;

– Ихтисослаштирилган тиббиёт муассасаларида бепул махсус (амбулатор ёки кундузги) тиббий ёрдам кўрсатиш бўйича йўлланма (ордер) олиш.

Изоҳ: «Ижтимоий ҳимоя ягона реестри” ахборот тизими орқали мазкур иловада кўрсатилмаган бошқа ижтимоий хизматлар ва имтиёзлар ҳам жорий этилиши мумкин.

Буларнинг барчаси Мамалакатимизда аҳолига кўрсатилаётган ижтимоий хизматлар ва ёрдамнинг манзиллилигини янада ошириш бўйича изчил чора-тадбирларни амалга оширишга ва аҳолини ижтимоий ҳимоя қилиш тартиб-таомилларини босқичма-босқич рақамлаштиришга қаратилган.

 

“Мадад” ННТнинг Қумқўрғон туман ҳуқуқий маслаҳат бюроси бош мутаҳассиси Маматов Фаҳриддин.