Mehnatkash, saxovatli, sohibkor, tanti qishloq xo‘jaligi sohasi xodimlari, fermerlar, dala bahodirlari har doim e`zozlangan. Ular ona zaminimizning rizqi-ro‘zi manbai bo‘lishi uchun bilimi, g‘ayrati, shaxtini ayamay ishlovchilar.
Zamonning rivojlanishi, ilg‘or ish tajribalari, texnologiyalarning joriy etilishi soha mutaxassislarini yanada oqilona mehnat qilishiga olib keldi.Qumqurg‘on tumani yerlari unumdorligi, dalalar, sanoat korxonalari, qishloq xo‘jaligiga taalluqli tashkilotlar va korxonalarda ishlovchi zahmatkashlarning ulkan yutuqlarini qo‘lga kiritishiga olib kelgan. Paxtakorlar va g‘allakorlar, bog‘bonlar va chorvadorlar, fermerlar va tomorqa egalari mo‘l hosil, pilla, meva-sabzavot, g‘osht va sut, tuxum yetishtirib zafar marralarini egalladi. Paxtakorlar va g‘allakorlarning respublika miqyosida birinchi bo‘lib shartnoma rejalarini bajarganligi yodlarida saqlanib zafar marralariga boshlamoqda. Agrotexnika qoidalariga amal qilib mehr bilan ishlagan muxandislar, haydovchilar, suv xo‘jaligi xodimlari, miroblar, suvchilar yutuqlarga munosib hissa qo‘shgan. Ular hurmatga sazovor.
“To‘maris” tantanalar saroyida qishloq xo‘jaligi xodimlari kuni munosib nishonlanib, barchaning qalbiga ezgu maqsadlarni soldi. Tuman hokimi Anvar Normamatov qishloq xo‘jaligi xodimlarini kasb bayrami bilan samimiy tabrikladi. Mehnat yutuqlariga erishgan bir guruh soha xodimlariga, fermerlarga, tomorqa egalariga, nuroniylarga estalik sovg‘alarini topshirdi. “Un mojizasi” fermer xo‘jaligi rahbari, “Shohruh Soatov” fermer xo‘jaligi rahbari “Ilg‘or fermer” ko‘krak nishoni, “Munchoqtepa” mahallasidan Bekkamtosh Jumayeva “Namunali tomorqachi” ko‘krar nishoni bilan taqdirlandi.Tumanning ijtimoiy-iqtisodiy rivojlanishiga ko‘p yillar davomida katta hissa qo‘shgan nuroniylarga hurmat ko‘rsatilib sovg‘lar berildi. Jumladan, Abduxoliq Samadov, Shuhrat Yusupov, Yusuf Mengliqulov, Kamol Choriyev, Faxriddin Qo‘ziyev, Qurbon Choriyev, Abdusamat Shaydullayev, Bahodir Mirzayev kabi ko‘plab tumandoshlarimiz to‘n, televizor, uy-ro‘zg‘or buyumlari bilan rag‘batlantirildi. Jami 46 nafar xodimlar bunday mehr-saxovatdan bahramand bo‘lishdi. Elimiz suygan san`atkor Mahmud Nomozov ijro etgan kuy-qo‘shiqlar barchaga manzur bo‘ldi.
N. MUHAMMADIYEV
