Йиллар қандай ўтганини сезмай қолибман. Кечагина 1 синфга келганимда ўқишни, ёзишни ўрганган бўлсам, бугун мен мактаб остонасидан катта ҳаёт аталмиш кураш майдонига эзгу ният, катта умидлар, юксак мақсадлар билан қадам қўймоқдаман.
Бу йўлда менга ота-онамнинг берган тарбияси ва албатта, устозларимнинг тинимсиз меҳнати, йиллар давомида чеккан заҳмати, ўргатган билимлари асқотади. Шу ўринда айтиб ўтишим керакки, менинг биринчи устозим Мамадиёрова Саломат опага, 5-8 синфда синф раҳбарлик қилган Тошбоева Наргиза Абдурахмоновнага, 9 синфда синф раҳбарлик қилган Амонова Гулшода Каримовнага ва ҳозирги 10-11 синфда синф раҳбарлик қилган Тўраева Сафартош Тўраевнага, шу жумладан мактабимиз директори Эргашев Эшмамат Тоштемировичга, шу билан бирга 11 йил давомида таълим-тарбия бериб келган устозларимга алоҳида миннатдорчилигимни изҳор этаман. Шуни ҳам таъкидлаб ўтишим керакки, устозларимнинг тўғри йўлда менга ўргатган битта ҳарфининг аҳамиятини бутун ҳаётим давомида меҳнат қилиб амалга ошираман.
Мен 11 йил давомида мактаб давримда қанча ютуқларга эришган бўлсам барчасининг ортида устозларимнинг меҳнати ётаркан, бу ютуқларда уларнинг ҳам ўз ўрни бор дея бемалол айта оламан. Мен шундай устозларим ва 33-мактаб маъмурияти билан фахрланман. Устозларимнинг келгуси меҳнат фаолиятида улкан зафарлар тилаб қоламан. Тенгдошларимнинг ўз олдига қўйган мақсадларига етишишига ва бу йўлда хеч қачон енгилмаслигига тилакдошман. Келажак биз ёшларнинг қўлимизда экан, Юртбошимизнинг бизга бўлган ишончини оқлашга, ота-оналаримиз ва устозларимизнинг бизга бўлган умидларини амалга оширишга чин қалбдан ва шижоат билан ҳаракат қиламан.
Назира ХУРРАМОВА,
33-мактабнинг 11 «А» синф ўқувчиси
