Кейинги йилларда хотин-қизлар бандлигини таъминлаш, уларнинг тадбиркорлик фаолиятларига кўмак беришга эътибор ошганлиги натижасида тадбиркор аёллар сафи кенгаймоқда. Хусусан, департамент ходимларининг тадбиркорлик субъектларининг ҳуқуқ ва манфаатларини ҳимоя қилиш ва уларга яқиндан кўмаклашиш мақсадида олиб бораётган ўрганишлари ҳам ўз самарасини бераяпти.
Қумқўрғонлик Дилором Сафарова 35 ёшда. У 4 нафар фарзанди ва 2-гуруҳ ногирони бўлган турмуш ўртоғи билан йўқчилик азобларини сабр билан енгиб келаётган матонатли ва шижоатли аёллардан. Айни пайтда “Темир дафтар”да исм шарифлари қайд этилган оиланинг ишга яроқли бўлган вакили мана шу аёл ҳисобланади. Ўз вақтида берилган кўмак натижасида Дилоромнинг ҳаётга, яшашга бўлган қизиқиши ортиб, йўқчилликни енгишига сабаб бўлди. «Оилавий шароитим қийинлиги туфайли “Темир дафтар”да тураман. Туман прокурорига мурожаат қилдим. Департаментнинг Қумқўрғон туман бўлими кўмаги билан банкдан 30 миллион сўм кредит олиб музқаймоқ тайёрлайдиган аппаратни келтириб ўрнатдим. Ҳозир маҳсулот ишлаб чиқаряпман. Қолаверса, билдирилган ишончдан руҳланиб яна ҳам катта режалар сари интилмоқдаман. Чекланиб қолмоқчи эмасман, фаолиятимни кенгайтириб, иложи борича “Темир дафтар”дан чиқиб кетишга ҳаракат қилаяпман», – дейди Д. Сафарова.
Яшаш хонадонининг бир қисмида ташкил этилган бу кичик фаолият туридан аҳоли ҳам мамнун. “Аёллар дафтари”, “Ёшлар дафтари” ҳамда “Темир дафтар”ларнинг жорий этилиши ва улар асосида аҳолига кўмак берилаётганининг гувоҳи бўляпмиз. Бу эзгу ишлар одамларнинг ишчанлик қобилиятига ижобий таъсир этиб, янги-янги ғоялари сари ундамоқда. Ўзини ўзи банд этишдек ёндашувнинг амалдаги натижалари ҳам намоён бўлмоқда.
Б. Ачилдиев,
Департаментнинг Қумқўрғон туман бўлими инспектори
