Табиий ёки суюлтирилган газнинг турмушимиздаги ўрни беқиёс. Биз учун катта қулайлик манбаи бўлган газдан фойдаланишда эътибор ва хушёрлик талаб этилади.

Табиий ва ис гази билан заҳарланишга қуйидагилар сабаб бўлиши мумкин:

– табиий газ тўлиқ ёнмаслиги оқибатида ҳосил бўладиган ис газининг салбий таъсири;

– хонадонлар иситиш тизимига табиий газ билан уланишда меъёрий талабларга риоя этилмаслиги;

– табиий газдан фойдаланишда техника хавфсизлиги қоидаларига риоя қилинмаслиги;

– иситиш учун мўлжалланган печка ҳамда мўриларнинг соз ҳолатда эмаслиги, яхши тозаланмагани ва бошқалар.

Хонада табиий газ йиғилиб қолса, зудлик билан қуйидагиларни амалга ошириш зарур:

– хона деразаларини очиб, шамоллатиш;

– хонадаги электр жиҳозларни ёқмаслик, ёниқ бўлса ўчирмаслик;

– газ жўмракларини беркитиш;

– газни беркитишнинг иложи бўлмаса, ёрилган, синган ва тешилган жойлар аниқланса, газ таъминоти авария хизматига хабар бериш.

Табиий ва ис газларидан заҳарланиш ҳолатлари билан боғлиқ нохуш вазиятлар юз берса:

– заҳарланган кишига биринчи тиббий ёрдам кўрсатиш;

– “103” телефон рақами орқали “Тез тиббий ёрдам”га хабар бериш;

– “104” телефон рақами орқали газ таъминоти идораси навбатчи ходимига қўнғироқ қилиш;

– “1050” фавқулодда вазиятлар бошқармасининг авария-қутқарув хизматига мурожаат қилишни ёдда тутиш муҳим.