7 апрель куни туманимизда COVID-19 га қарши вакцинация жараёни бошланди.
Юртимизда юқумли касалликларга қарши профилактик эмлаш дастури ҳамиша асосий устувор йўналишлардан бири ҳисобланади. Жамият саломатлиги ва айниқса болалар ҳамда ёши улуғ нуронийларимиз соғлиги бўйича давлат ҳар томонлама ғамхўрлик қилмоқда.
Давлатнинг муҳим ютуқларидан бири кўп йиллардан бери миллий эмлаш дастурига давлат сиёсати сифатида қаралишидир. Бу эса, эмлаш билан қамраб олиш ва юқори кўрсаткичларга эришишда режали эмлашнинг иқтисодий таъминотида олдига қўйилган вазифаларни биргаликда ҳал қилинишида замин яратади.
Тумандошларимизни эмлаш учун туман Санитария ва эпидемиологик осойишталик ва жамоат саломатлиги бўлимида вакциналарни сақлаш учун барча шароитлар яратилган. Вакциналар учун алоҳида керакли ҳароратда ушлаб турадиган транспорт воситаси ҳамда махсус бино фаолият кўрсатмоқда, дея таъкидлади туман санитария ва эпидемиологик ва жамоат саломатлиги бўлимининг эмлаш вакциналарини сақлаш мудири Музаффар Рахманов. Туманимиздаги барча эмлаш пунктларига вакциналар махсус транспорт воситасида етказилади. Эмлаш хоналарида ҳам гигиена талабларига амал қилган ҳолда махсус қутичада вакциналар сақланади.
Биринчи босқичда 65 ёшдан катта бўлган фуқаролар ҳамда тиббиёт ходимлари эмланмоқда. Бир кун олдин поликлиникада тайёргарлик ишлари тугатилиб, иккита вакцина Хитой-Ўзбек (ZF-UZ-VAK2001) ва AstraZeneca (Ҳиндистондан келтирилган Covishield) олиб келинган. Поликлиника бош шифокорининг сўзларига кўра, Хитой-Ўзбек вакцинаси уч маротаба, AstraZeneca вакцинаси эса 21-28 кун оралиғида икки маротаба қилинади.
Иккинчи босқичда, умумтаълим мактабларининг педагог ходимлари 6150 нафар, мактабгача таълим ташкилотлари ходимлари 717 нафар, Оммавий ахборот воситалари ходимлари 7 нафар жами туман бўйича 18891 нафар фуқароларимиз эмланади.
Поликлиникада рўйхатдан ўтиш, вакцина олиш, кузатув ва тиббий ёрдам кўрсатиш хоналари тайёрлаб қўйилган.
Вакцинациядан олдин фуқаролар тиббий кўрикдан ўтади. Поликлиникада кузатув хонаси ташкил этилган бўлиб, фуқаро эмланганидан сўнг 30 дақиқа давомида шифокорлар кузатувида бўлади, ундан кейин уларга жавоб берилади. Вакцинадан ножўя таъсир кўрганларга тез тиббий ёрдам кўрсатилади.
AstraZeneca (Ҳиндистондан келтирилган Covishield) олиб келинган. Поликлинка бош шифокорининг сўзларига кўра, Хитой-Ўзбек вакцинаси уч маротаба, AstraZeneca вакцинаси эса 21-28 кун оралиғида икки маротаба қилинади –дейди туман санитария ва эпидемиологик ва жамоат саломатлиги эпидемиология бўлими мудири Эшбой Хуррамов.
Мамлакат вакцина ва инфекция материалларини етказиб бериш сифатини таъминлаш учун қонуний асосга эга. Ўз ваколатларини яхши биладиган тегишли органлар жараённи баҳолаш ва вакциналарни сотиб олиш билан шуғулланади. Миллий календар доирасида қўлланилаётган вакциналарнинг сифати аввал ЖССТнинг вакцинага берган малакаси билан кафолатланади. Профилактик эмлаш режаси асосида вакциналарга ва хавфсиз эмлаш воситаларига бўлган эҳтиёж аниқланади, бу эса ўз вақтида, сифатли, хавфсиз ва тўлақонли эмлашни таъминлайди.
Вакцина олишга келган тумандошларимиз орасида 66 ёшни қарши олган Ҳакимов Жангир бобо ҳам бор. “Сурхон соҳили” маҳалласидан келган нуроний отахонимиз барчамизнинг саломатлигимиз учун қайғурадиган Юртбошимиз билан фахрланишини айтди. Бутун дунёда хавф солаётган вирусга қарши эмланиш бугунги кунда туманимизда ҳам амалга оширилмоқда. Эмланиш учун кўплаб жаҳон давлатлари фуқаролари навбатда турган бир вақтда, бизнинг Юртимизда бу жараён илдамлик билан олиб борилмоқда.
Эмлаш фақат бу соҳада махсус поликлиникада тайёргарликдан ўтган ва ҳар йили тасдиқланган сертификатга эга бўлган ҳамда эмлаш хонасида ишлашга рухсати бўлган тиббиёт эмлаш ходими томонидан амалга оширилади.
Зеро, Сизнинг саломатлигингиз жамиятимиз учун муҳим аҳамиятга эга. Шундай экан, ўз саломатлигингизга бефарқ бўлманг.
Райҳон МЕНГЗИЯЕВА
