Коронавирус белгилари оддий гриппдан қандай фарқ қилади?

Коронавирус дунё бўйлаб кутилмаганда қайта бош кўтарди. Вирус дунё бўйлаб пандемияга айланиб, ўз кучини шиддат билан кўрсатмоқда.
Аксар беморлар Хитойда, лекин вирус Жанубий Корея, Италия ва Эрон, Америка Қўшма штатларида кўп одамда топилди ва бу мамлакатлар уни жиловлашга интилмоқдалар. Дунё қўрққан Covid-19 касали қандай кечади?
Аломатлари қандай?
Жаҳон соғлиқни сақлаш ташкилотига биноан, афтидан:
Вирус ваража билан бошланади ва қуруқ йўтал тутади.
Бир ҳафтадан кейин нафас олиш қийинлашади ва айримлар касалхонага ётиши керак бўлади.
Бош ва мушаклар оғрийди.
Одам ўзини чарчагандек ҳис қилади.
Эътиборли жиҳати – коронавирус юқтирган одам жуда кам ҳолларда бурни оқади ёки аксиради.
Бемор қачон хавфли?
Жаҳон соғлиқни сақлаш ташкилотига кўра, вируснинг яширин даври 14 кунгача чўзилиши мумкин.
Баъзи олимлар эса коронавируснинг инкубацион даври ҳатто 24 кунга етиши мумкин, дейишмоқда.
Хитой олимлари янада хатарли жиҳатини урғулашмоқда:
Вируснинг бирон аломати кўринмасдан олдин ҳам уни ташувчи одам касалликни бошқаларга юқтириши мумкин.
Коронавирус қанчалик қақшатқич?
44 минг беморни ўрганиш натижасида Жаҳон Соғлиқни Сақлаш Ташкилоти хулоса қилади:
81% – ҳар ўнтадан саккизта одамда аломатлар енгил кечади.
14% – тахминан ҳар еттинчи беморда оғир аломатлар кузатилган.
5% – ҳар йигирманчи киши жуда қаттиқ касал бўлади.
1% ёки 2% – Элликтадан битта ёки юзтадан битта бемор оламдан ўтади. Ўлим ҳоллари анча паст, лекин ўта ишончли эмас.
Чунки ҳозир даволанаётган минглаб одамлар ҳам оламдан ўтиши мумкин.
Айни пайтда, касалликни енгил ўтказган кўплаб одамлар шифокорга бормаган ва ҳисобга олинмагани эҳтимоли ҳам бор.
Даво борми?
Ҳозирча вирусни юқтирган одамни грипп бўлган бемор каби даволашмоқда.
Касални тирик тутиб туришга интилмоқдалар, нафас олишига ёрдам берилмоқда.
Инсоннинг ўз иммун тизими вирусга қарши курашмоқда.Айнан коронавирусга қарши вакцина ёки махсус дори йўқ. Аммо коронавирусга қарши зидди-заҳар ёки вакцина яратиш жараёни кечмоқда. Касалхоналар эса аксилвирус дориларини ҳам синаб кўришмоқда. Юртимизда ҳам бу касаллик билан оғриган беморлар аниқланмоқда. Сўнгги бир ой мобайнида Муҳтарам Юртбошимиз раҳномолигида ушбу инфекцияга қарши курашиш чоралари кучайтирилди. Карантинга олинган фуқаролар, ушбу инфекция билан курашаётган беморларнинг саломатликлари мунтазам равишда кузатиб борилмоқда.Бошга мусибат тушганда инсонпарварлик ёрдами кўрсатилиши, дўстларингнинг қандайлигини билдиради. Юртимизга ҳам кўплаб давлатлардан инсонпарварлик ёрдамлари келмоқда. Жонкуяр, фидокор шифокорларимизнинг ҳаракатлари натижасида хасталанган беморлар ҳаётга қайта қайтишмоқда. Бундай синовли кунларда бирдамликда қилган ҳаракатимиз эртанги келажагимизнинг мустаҳкамлигини таъминлашини унутмаслигимиз лозим.
Улуғбек МУСАЕВ,
туман тиббиёт бирлашмаси бошлиғи ўринбосари