Алишер Навоий авлодлари

Агар, бу – зотни авлиё десак, у-авлиёларнинг авлиёси, мутафаккир десак – мутафаккирларнинг мутафаккири, шоир десак- шоирларнинг султонидир. Инсон қалбининг қувонч-у қайғусини, эзгулик ва ҳаёт мазмунини Навоийдек теран ифода этган шоир жаҳон адабиёти тарихида камдан-кам топилади.
Ислом Каримов

Буюк ўзбек шоири , мутафаккир, давлат арбоби, шунингдек, ғазал мулкининг султони Алишер Навоий бобомизнинг ғазал-у шеърларини, рубоий ва ибратли сўзларини ёд олиб хиргойи қилмаган бирорта ўзбек ўғил-қизи қолмаган бўлса керак. Мана 580 йилдирки, у қалбимизда, фарзандларимиз тасаввурида мангу яшамоқда десам адашмайман.
Биринчи Президентимиз ташаббуси билан 1991-йил Алишер Навоий йили деб белгиланиши бежиз эмас, албатта. Зеро, Навоий ўзининг ҳаёти ва фаолиятини юрт мустақиллиги ва тинчлиги, ўзбек тилининг равнақи учун бахшида этган эди. Биз педагогларнинг вазифамиз эса фахр ва ифтихор туйғуси билан, бундай буюк бобокалонларимиз меросини келажак авлодга етказишдир. Куни кеча 4-ДМТ ташкилотида иккинчи тайёрлов гуруҳ тарбияланувчилари иштирокида “Буюк зотга таъзим” деб номланган тадбир кечасида сўзим исботини кўришингиз мумкин. Байрам кечамизда кичик Алишер-у Увайсийлар иштирокида саҳна кўринишлари, ғазал-у шеърлар ижро этилди. Тадбирда турли хил ташкилотлардан келган меҳмонлар сўзга чиқиб болажонларимизга тасанно айтишди. Жумладан, «Маҳалла» хайрия жамоат фонди Қумқўрғон туман бўлинмаси раҳбари Бахтиёр Менглибоев ҳам кечамизда меҳмон бўлиб сўзга чиқди. Шунингдек, Ахборот ресурслар марказидан келган меҳмонлар эса ўзларининг арзимас совғалари билан болажонларимизни қувонтиришди. Байрамимиз мана шундай кўтаринки кайфиятда бўлиб ўтди. Бундай тадбирларни нишонлашимиздан кўзда тутилган асосий мақсадимиз, буюк бобомиз Алишер Навоийдек ўзбек фарзандларини етиштириб чиқаришдир. Зеро, биз буюклар авлодиданмиз!
Назокат Хўжаназарова,
4-сон ДМТТ тарбиячиси