Биласизми?

Давлат бошқаруви ва аҳолига хизмат кўрсатиш тизимида сўнгги йилларда салмоқли ишлар амалга оширилди. Бунда, албатта, илғор жаҳон тажрибасидан фойдаланилди ва фойдаланилмоқда. Аҳолига давлат хизматини кўрсатишнинг янги тартиб ва услубларини қўллаш мавжуд вазиятнинг талаби. Аҳолининг давлат органлари билан маъмурий ҳуқуқий муносабатга киришиши улар учун қулай ва албатта, ортиқча оворагарчиликларсиз бўлиши лозим.
Ўзбекистон Республикаси Президентининг “Давлат хизматлари кўрсатиш миллий тизимини жадал ривожлантириш бўйича қўшимча чора-тадбирлар тўғрисида”ги ПФ-5930-сон Фармонига “3”-илова билан Давлат хизматлари марказлари орқали кўрсатиладиган давлат хизматларини кўрсатишни такомиллаштириш бўйича “Йўл харитаси” тасдиқланган бўлиб, унга кўра Ўзбекистон Республикаси Адлия вазирлиги туғилганлик ҳақидаги тиббий маълумотнома, болани давлат мактабгача таълим муассасасига қабул қилиш, яшаш жойи бўйича рўйхатга олиш, поликлиникага ҳисобга қўйиш бўйича комплекс давлат хизматларини кўрсатишни ташкил этиши белгиланган эди. Шу фармон ижросини таъминлаш мақсадида Ўзбекистон Республикаси Вазирлар Маҳкамасининг “Туғилганликни қайд этиш билан боғлиқ комплекс давлат хизматларини кўрсатишнинг маъмурий регламентини тасдиқлаш тўғрисида”ги ВМҚ-704-сон Қарори қабул қилинди. Мазкур қарор билан “Туғилганликни қайд этиш билан боғлиқ комплекс давлат хизматларини кўрсатишнинг маъмурий регламенти” “1”-иловага асосан тасдиқланди.
Унга кўра, бола туғилган жойдаги тиббиёт муассасаси ходими бола туғилганидан сўнг 1 кун ичида бола ва ота-онаси ҳақидаги маълумотларни “Туғилиш ва ўлимни, шу жумладан перинатал ўлимни электрон рўйхатга олиш” ахборот алмашинуви тизимига киритади.
Маълумотлар автоматик равишда “ФҲДЁ ягона электрон архиви” ахборот тизимига юборилади.
ФҲДЁ бўлими маълумотларни қабул қилиб олганидан сўнг 3 иш соати ичида кўриб чиқади ва болага туғилганлик ҳақидаги гувоҳномани расмийлаштиради.
Маълумотлар комплекс тартибда бошқа хизматларни кўрсатиш учун автоматик равишда Ички ишлар, Мактабгача таълим, Соғлиқни сақлаш вазирликлари ҳамда бюджетдан ташқари Пенсия жамғармаси ахборот тизимларига юборилади.
Шунга кўра:
– Туман (шаҳар) ички ишлар бўлими – болани 1 кун ичида тегишли манзил бўйича доимий рўйхатга қўяди;
– Мактабгача таълим вазирлиги – мактабгача таълимни бошқаришнинг ахборот тизимида сўровда кўрсатилган боғчага болани автоматик равишда навбатга қўяди;
– Соғлиқни сақлаш вазирлиги – 1 иш куни ичида она рўйхатда турган поликлиникага (рўйхатда турмаган тақдирда доимий ёки вақтинча рўйхатда турган яшаш манзилидаги поликлиникага) болани рўйхатга қўяди;
– Пенсия жамғармаси бўлими – фарзанд туғилганда бериладиган бир марталик нафақа пулини автоматик равишда расмийлаштиради.
Боланинг отаси ёки онаси бола туғилгандан бошлаб 6 ой муддат ичида бир марталик нафақа пулини олиш учун Халқ банкининг исталган филиалига мурожаат қилиши мумкин (6 ойдан кейин мурожаат қилинса, бир марталик нафақани тўлаш рад этилади).
Туғилганликни қайд этиш билан боғлиқ комплекс давлат хизматлари Тошкент ва Нукус шаҳарларида, 2021 йил 1 февралдан барча вилоят марказларида, 2021 йил 1 сентябрдан бошлаб бутун республика ҳудудида кўрсатилади.

Ханифа ҚУЛМАТОВА,
туман ФҲДЁ бўлими 1-тоифали инспектори