Ёшлик инсоннинг порлоқ келажаги учун уруғ қадайдиган баҳор палласидир. Бу неъматдан унумли фойдаланиб, ўзининг салоҳиятини ошириб борган, жамиятда муносиб ўрин эгаллашга киришган инсоннинг эртаси нурафшон.
Аммо, айримлар “Ёшлик – бебошлик” дея ножўя ҳаракатларга қўл уриб жиноят кўчасига кириб қолганини билмай қоляпти. Шундай бебошликка қўл урган навқирон йигит П.З (исм фамиляси ўзгартирилган) савдо маскани омборхонасида ўғирлик содир этган. Бундан уч йил муқаддам ҳам жиноят содир этиб жазо олган. Бироқ “Кўр ҳассасини бир марта йўқотади”, – деган нақлга амал қилмасдан яна қайта жиноятга қўл уради. П.З. таниши О.Ж.(исм фамиляси ўзгартирилган) билан ўзаро жиноий тил бириктириб, бир гуруҳга бирлашиб, 2020 йилнинг 7 август куни тунги соат 01: 00 ларда тумандаги “Боғаро” маҳалласида жойлашган” Siroj Samariddin Sabina” оилавий корхонасига тегишли компьютер хизматлари кўрсатиш хонасига орқа деразаси орқали ғайриқонуний равишда кириб, икки дона 43 диагонал телевизорларни яширин равишда ўғирлаб, воқеа жойидан яширинишган. Бундайлар ўз бошига ўзи кулфат сотиб олади, десак хато бўлмайди. Агар улар ҳам ўз муваффақиятлари билан юрт равнақига ҳисса қўшаётган ёшлардан ибрат олганида, уларнинг ота-оналари фарзандларига бефарқ бўлмаганларида эди бугун ёшлар жиноятчилиги анча камаярди. Адашган ёшлар майда безорилик, ўғирликка қўл уриб бебаҳо, бетакрор умрнинг олтинга тенг дамларини самарасиз ишларга сарф қилишади. Ёшлар эртамиз кўзгуси. Уларнинг келажаги бутун бир миллатнинг ширин ташвишидир. Ҳозирда барча жабҳада ёшлар масалаларига алоҳида эътибор қаратилмоқда. Айниқса ёшлар ўртасида ҳуқуқбузарликлар ва жиноятларнинг олдини олиш учун нафақат ота-она, маҳалла, балки бир қатор ташкилот ва идоралар ҳам масъул этиб белгиланган. Келажагимиз ёшларнинг қўлида эканлигини унутмаган ҳолда улар томонидан жиноят ёки ҳуқуқбузарлик эмас, эзгу ва бунёдкорлик ташаббуслари чиқишини, шундай ишлар амалга оширилишини таъминлаш учун барчамиз бирдек ҳаракатда бўлмоғимизни замоннинг ўзи талаб қилмоқда.
Т. Тажиев
Жиноят ишлари бўйича Қумқўрғон туман судининг девонхона мудири
